Kriza, BSH: Konstatohet ngadalësim ekonomik

Shqipëria po përballet me ngadalësim ekonomik gjatë këtij viti. Konstatimi është bërë nga Banka e Shqipërisë, sipas të cilës analiza e një sërë treguesish ekonomikë dhe financiarë ka dëshmuar për një ngadalësim të aktivitetit ekonomik në vend gjatë vitit 2009. Sipas BSH-së, kjo vjen në përgjigje të ndikimeve të krizës ekonomike botërore. Në raportin e saj të fundit, ky institucion ka vlerësuar se "Ulja e ritmeve të kredisë, ngadalësimi i zgjerimit monetar, zhvillimet në bilancin e pagesave gjatë muajve të parë të vitit 2009, ecuria e disa treguesve fiskalë dhe opinionet e biznesit e konsumatorëve, sugjerojnë se kërkesa e brendshme ka ardhur në rënie".
Ky zhvillim është reflektuar në reduktimin e shkallës së shfrytëzimit të kapaciteteve të bizneseve dhe në uljen e presioneve të brendshme inflacioniste.

Sipas raportit, informacioni më i fundit dhe analizat përkatëse sugjerojnë ngadalësim të aktivitetit ekonomik në vend në tremujorin e parë, i shprehur ky në ngushtimin e aktivitetit kredidhënës për sektorin privat, në rënien e eksporteve, në ngadalësimin e ritmit të zgjerimit monetar dhe në mosrealizimin e planit të të ardhurave fiskale. "Rezultatet e vrojtimeve të besimit konfirmojnë rënien e ritmit të rritjes së ekonomisë në tremujorin e parë dhe të dytë 2009, duke sinjalizuar dobësimin e kërkesës së brendshme dhe asaj të jashtme"- thuhet në raport.

Gjithahstu, edhe tremujori i parë i vitit 2009 dëshmon për përkeqësim të pozicionit të jashtëm të vendit si pasojë e zgjerimit të deficitit korent, i cili ka rezultuar rreth 25 për qind më i lartë se një vit më parë. Rënia e kërkesës së brendshme dhe të jashtme ka sjellë rënien e importeve dhe të eksporteve, duke rezultuar me një ngushtim të lehtë të deficitit të bilancit tregtar. Eksportet dhe importet e mallrave shënuan rënie vjetore, respektivisht prej 14.7 për qind dhe 5.6 për qind.

Aktiviteti ekonomik botëror, sipas BSH-së, i matur nga rritja ekonomike, niveli i tregtisë globale dhe i lëvizjes së flukseve të kapitalit, ka vijuar të ngadalësohet më tej gjatë muajve prill-maj. Ndërkohë që në vendet e zhvilluara, vërehet një moderim i ritmeve të rënies, treguesit ekonomikë ende nuk flasin për një përfundim të shpejtë të recesionit ekonomik. Banka sqaron më tej se zgjatja dhe intensiteti i lartë i krizës kanë sjellë përkeqësimin e situatës ekonomike të vendeve në zhvillim, duke përfshirë edhe vendet e rajonit, ndërkohë që disa prej tyre kanë rënë në recesion. Çmimet e lëndëve të para dhe bazë mbeten më të ulëta se ato të së njëjtës periudhë të vitit të kaluar.
Në mbledhjen e fundit të Këshillit Mbikqyrës u vendos që të mbahet e pandryshuar norma e interesit.

 

Burimi informativ / Shekulli

Shtoni ne: | | | | | | | | | | | | | | | | |