Per pushime ne Seman me buke,uje,bebelina e bidon benzine me vete

Plazhi i Semanit

Pushime në Seman mes diellit, detit dhe mbeturinave të nafts bruto, ku mund ti kombinosh edhe mes dialekteve që flasin fierakët, lebërit, mallakastriotët, camët, kosovarët dhe gramshiotët, mund të kalohen në një nga mënyrat më të përsosura duke shijuar jo vetëm kurën e rërës, freskinë e ujit por edhe gatimet e zonës, gërshetimin e kulturës e traditës së tyre

Edhe pse goditi kriza globale dhe nafta bruto ende vazhdon që të derdhet duke përfunduar në det nëpërmjet kanaleve të zonës naftënxjerrse të Marinzës në Seman Beach, Darrëzezë apo Pishporo, me shumë kioska dhe shumë pak lokale, vazhdojë për të tërhequr turistët dhe tregtarët jo vetëm nga zona e Fierit  dhe fshatrat përrreth tij por edhe nga zona të tjera.

Shumica e pronarëve të kioskave apo lokaleve që numërohen me gishtat e duarve nuk janë profesionistë, ende nuk dinë që të veprojnë  për të tërhequr pushuesit.

Dembelizmi apo indiferentizmi, mungesa e kulturës së duhur të shërbimit ka bërë që edhe rreth lokaleve apo kioskave që ata disponojnë  të mos pastrojnë që të “thithin” klientin, e akoma më keq ato pak pije freskuese apo sende që mbajnë në to nuk i mbajnë ashtu si duhet , por të thonë këto kemi, po deshe merre. Mungon kultura e tregëtisë, mungon kultura e shërbimit që të afrojë klientin e akoma më keq mungon investimi shtetëror. Eshtë ky i fundit “që nuk ka bërë asgjë”, por edhe ai pak që është bërë, është bërë nga privati. Dakort në një farë mase, po besojmë atë që pohon pushteti qëndror apo lokal , por përse nuk lejohet edhe individi që të bëjë investime, ti lihet hapësirë veprimi duke lidhur kontrata disa vjecare me përdorim? Kjo në një farë mënyre  do të bënte që edhe në këtë zonë që është rreth 35 km vijë bregdetare e mrekullueshme të shfrytëzohet prej privatit por nga ana tjetër individi, pushuesi atë që do të harxhonte për të pushuar diku më larg, të vijë e ta përdorë këtu në vendin e tij, në bregdetin e Semanit. Ku janë politikat menaxhuese të qarkut? Ku janë përparësitë që premtuan kur morën drejtimin e këtij institucioni? Cfarë është bërë? U fol për zyrë menaxhimi turizmi, ku  është puna e bërë deri më tani? Cfarë pritet e nga kush pritet? Kur nuk ke mundësi të japësh ide, të investosh përse i mbyll rrugën edhe biznesit privat? Cfarë investimesh ka kur nuk ka një tualet, por ajo më e mira është pas ndonjë ferre në pyll. 35 km vijë bregdetare e s’ka një tualet.

Në një pjesë të mirë të kësaj zone shikon zona të tëra të rrethuara e me tabela “zonë private”. Kush i ka shitur, kush i ka ndarë? Si i kanë marrë? A e meritojnë? A u takon? Janë disa pyetje që bëhen nga gjithkush që i shikon kur e viziton këtë zonë, por që nga askush nuk kthehet përgjigje edhe pse e kanë për detyrë.

Fieri.Com / Xhemil Beharaj